„Iza svakog broja stoji sudbina“

Share on facebook
Share on twitter
Share on whatsapp
Share on email
U nedjelju je širom Njemačke održan dan sjećanja na žrtve pandemije. Namjera je bila da se na tren zaborave političke prepirke i statistike, i razmisli o svakoj smrti. Komentatori u štampi misle da je namjera uspjela.
Share on facebook
Share on twitter
Share on whatsapp
Share on email

Ovaj članak može da se sluša Poslušajte tekst koji slijedi u nastavku

„Umorni smo od tereta pandemije, izmrcvareni svađom o tome koji je pravi put. Zato nam treba trenutak tišine, trenutak s onu stranu dnevne politike, momenat koji dopušta zajednički pogled u pandemiju kao ljudsku tragediju“, rekao je njemački predsjednik Frank-Valter Štajnmajer u nedjelju, kada je širom Njemačke održan pomen i dan sjećanja na žrtve pandemije.

U Njemačkoj se do sada oko 80.000 smrti povezuje sa korona-virusom. Broj mrtvih u svijetu prevalio je tri miliona.

„Moja molba danas je da govorimo o bolu, patnji i bijesu. Ali nemojmo se izgubiti u pripisivanju krivice, u gledanju unazad, nego sakupimo snagu za put naprijed, za izlaz iz pandemije koji ćemo pronaći ako idemo zajedno“, dodao je Štajnmajer na centralnom pomenu u Berlinu.

Njegov govor pozitivno ocjenjuje komentator lista Frankfurter rundšau: „Štajnamjer nije uljepšavao ni težinu pandemije niti lokdauna, čak ni političkih prepirki. Govorio je o ogorčenju, bijesu, greškama. Uprkos tome – ili baš zbog toga – osvijetljeno je ono što se u dnevnom natezanju sa koronom i statistikama često gubi iz vida: ultimativna patnja koju donosi pandemija je – smrt. Iza svakog broja stoji sudbina.”

Slično piše Augzburger algemajne: „Među debatnim emisijama i demonstracijama, među brojkama dnevnih zaraza i kvotama popularnosti političara, činjenica da je u Njemačkoj od ili sa virusom umrlo skoro 80.000 ljudi postala je hladna statistika. Na to ne smijemo da se naviknemo. Zato je bilo ispravno da se pokaže kako nas pandemija sve pogađa – svakog na svoj način. Da nas tuga i strah povezuju i da ovo vrijeme možemo da prebrodimo samo zajedno.”

Rajn cajtung (Koblenc) piše da ne treba vagati tugu zbog smrti ljudi od virusa sa tugom zbog drugih smrti. „Ali ipak je ova pandemija nacionalna trauma – baš kao i ratna iskustva ili prirodne katastrofe. U ovom slučaju je i globalna katastrofa. Zato je zajednički pomen ispravna stvar.“

Frankfurter algemajne cajtung piše da je dan sjećanja održan u momentu velike polarizacije: „Svakodnevno i skoro očajnički ljekari intenzivne njege i virusolozi zahtijevaju od nosilaca političke odgovornosti da djeluju brzo i odlučno kako bi spriječili još hiljade smrtnih slučajeva ili teških tokova bolesti kod mladih. Koliko je, sa druge strane, dio društva radikalizovan pokazalo se dan ranije na zabranjenim protestima Kverdenkera, bez maski. I ne samo tu: crna je slutnja napad na automobil političara Socijaldemokrata Karla Lauterbaha kojeg u tom miljeu preziru.”

Rajniše post je prenio fotografiju Lauterbahovog automobila preko kojeg je u Kelnu izručena farba. Lauterbah je jedan od najglasnijih zagovornika strogog lokdauna.

Pasauer noje prese o danu sjećanja optimistično zaključuje: „Kroz kolektivno tugovanje vidi se i nesalomiva volja da se prevaziđu pandemija, kriza i katastrofa.“

Čitajte više